धारावीत सॅनिटाइझ करणाऱ्या कर्मचाऱ्यालाच करोना

आशिया खंडातील सर्वात मोठी झोपडपट्टी असलेल्या धारावीतही करोनाने शिरकाव केला आहे. धारावीत करोनाचा लागोपाठ दुसरा रुग्ण आढळला आहे. धक्कादायक बाब म्हणजे सॅनिटाइझचं काम करणाऱ्या एका सफाई कर्मचाऱ्यालाच करोनाची लागण झाल्याचं उघड झालं आहे. त्यामुळे धारावीत खळबळ उडाली आहे.

धारावीत बुधवारी एका ५२ वर्षीय व्यक्तीचा करोनामुळे मृत्यू झाल्याने धारावीकरांची झोप उडाली होती. त्यामुळे हा व्यक्ती राहतो तो परिसर पूर्णपणे सील करण्यात आला होता. तसेच या व्यक्तीच्या कुटुंबीयांची, त्यांच्या शेजाऱ्यांची आणि त्याच्या संपर्कात आलेल्या लोकांची तपासणी करण्यात येत असून त्यांना घरातच क्वॉरंटाइन करण्यात आले आहे. प्रशासनाकडून धारावीत करोनाचा फैलाव होऊ नये म्हणून युद्धपातळीवर नियोजन सुरू असतानाच आज धारावीत करोनाचा आणखी एक रुग्ण आढळला आहे. हा ५२ वर्षीय सफाई कर्मचारी वरळीतील रहिवासी असून हा कर्मचारी धारावीत सॅनिटाइझिंगचं काम करत होता, असं सूत्रांनी सांगितलं.